صحافة بلادي صحيفة إلكترونية مغاربية متجددة على مدار الساعة تعنى بشؤون المغرب الجزائر ليبيا موريتانيا تونس
ضجة كبيرة نايضة فمواقع التواصل الإجتماعي و الدنيا مقلوبة والروينة ديال بصاح واقعة بسباب التصاريح غير محسوبة العواقب اللي خرج بيها وزير العدل عبد اللطيف وهبي مؤخرا و اللي للأسف استفزت الشعب المغربي بشكل كبير وتارث الغضب ديالو وخلات الوزير يبان ف موقف لا يحسد عليه من بعد ما تعرض لكمية انتقادات واسعة خلات البعض يخرج يطالب الوزير بتقديم استقالتو فالحال و يعتذر للمغاربة بل الأكثر من هذا طالبو باش يتم تفتح تحقيق فقضية مابات يعرف “بفضيحة نتائج امتحان المحاماة” اللي كايعتقد البعض أنه وقع فيها التخرويض والتلاعب ودخلات فيها المحسوبية و الزبونية وباك صاحبي.
هاد التصريحات اللي فتحات على وزير العدل نار جهنم الكحلة و خلات كل المغاربة وقنوات عالمية أنها تهضر عليها و عطات فرصة لمحترفي الصيد فالماء العكر باش يحلو علينا فامهوم و يلقاو مايعاودو.
وهبي دار تصريح آخر فالقناة الرسمية فبرنامج نقطة إلى السطر باش يوضح الأمور و يشرح لينا شنو وقع ولكن للأسف كانت حتى هي خرجة غير موفقة حسب البعض وخرج فيها على السطر عاوتاني لأنه كيف ماكايقول المثل المغربي الدارج .. بلاصت مايكحلها ..ازاد عماها حيت واخا اعتاذر من رجال القانون ف المغرب الأحياء منهم و حتى الأموات كما جاء على لسانه وقال أنه تعرض للإستفزاز غادي ينطق بجملة أخرى ضربات ليه هاد اللإعتذار فالزيرو وغادي يقول ” المشكلة كاينة فكلية الحقوق بمعنى هاهو رجع يضرب فمصداقية الأحياء و الأموات اللي عتاذر منهوم قبل لحظات” و يشكك فكلية عريقة درس بها الملك محمد السادس حفظه الله ورعاه ويقلل من شأن الكفاءات الجامعية وآلاف الخرجين منها و اللي كاتشرف عليهوم الوزارة اللي هو الوزير ديالها …إذن السي وهبي..كيفاش هاد القضية هادي ؟؟؟؟؟
من جهة أخرى كاينين مغاربة مدعمين وهبي فهادشي وكايقولو أنه كيفاش بغيتونا نتيقو بلي فعلا وقع التلاعب فالنتائج و احنا عندنا وزير كايعرف آش كاين فالتقاشر ديال المغاربة ومكاتخفاه خفية ….مايمكنش يكون هادشي بصاح.
البعض كايعتابرو أن الوزير وهبي كايتواصل حاليا بمنطق “الكلاش ” اللي كايضر بالصحة السياسية فالبلاد وكايضر حتى الصورة الجميلة اللي قدمها المغرب مؤخرا و كايرفض التشكيك فالنتائج و كايقول أنه اللي خدم فالإمتحان راه نجح واللي ماعاجبو حال يطلع للرباط ويشكي ويتبع المسطرة القانونية.
هاد الواقعة هادي خلات المغاربة يديرو مقارنة بسيطة بين ما وصفوه بالمدرسة “الوهابية” ديال مول التقاشر إشارة لعبد اللطيف وهبي و المدرسة “الركراكية” إ ديال مول النية اشارو للناخب الوطني وليد الركراكي ..وقالو أن اللولة كاتقول للمغاربة ولاد الطبقة الكادحة غير بلا ماتحلم توصل حيت النجاح حق لولاد مول الشكارة و التعليم فالمغرب ماساوي تا حاجة قدام الاجازة ديال كندا
أما المدرسة الثانية و اللي بغاها و احتارمها الشعب كامل قالت أنه مكاينش المستحيل ملي كاتكون الإرادة و العمل و النية ورضاة الولدين وأن من حق أولاد الفقرا تاهما يوصلو للمناصب العليا وأن المغرب و المغاربة واحد .. وكايجمعنا شعار واحد اللي هو الله الوطن الملك.
المصدر : صحافة بلادي
