صحافة بلادي صحيفة إلكترونية مغاربية متجددة على مدار الساعة تعنى بشؤون المغرب الجزائر ليبيا موريتانيا تونس
الدكتور يوسف احديدو يوضح حقيقة بيع أكياس الدم من طرف مراكز التحاقن التي يدعيها بعض الناس
على صفحته الفيسبوكية، توجه الدكتور “يوسف احديدو” الأخصائي في أمراض القلب والشرايين بالمستشفى الجامعي بوجدة إلى قرائه وعموم الناس، بتوضيح بالدارجة العامية المبسطة بين من خلاله حقيقة بيع أكياس الدم للمرضى من طرف مراكز تحاقن الدم الموجودة في مجموع تراب المملكة الشريفة، حيث قال في معرض بيانه:
“فاش الانسان كيتكلم عن جهل، كيخرب كثر ما أنه يصلح (وخا الدوافع تكون بنية صالحة!!)…
واحد صاحبنا داير منشور فمجموعة فيها آلاف الناس، كيقول للناس متمشيوش تبرعو حيت الدم لي كتعطيوه فابور، راه كيعاودو فيه البيع!! ورفق المنشور بفاتورة ديال 2 اكياس ديال الدم..
وقالهم هاد الحكيم بلا ما تمشيو تبرعو وفحالة احتاج شي حد من عائلتكم الدم سيرو معاه وتبرعو ليه مباشرة فنفس اليوم!!!
ولذلك وجب توضيح بعض الامور:
1) هداك الدم لي كيتم التبرع بيه ماشي كيجيو ويدوزوه للمريض هكاك !! راه كيمر من عدة مراحل لتأهيله وضمان سلامة المريض لي غيدوزوه ليه..ولذلك كيتم تحديد فصيلة الدم واجراء تحاليل السيدا والزهري وفيروس التهاب الكبد B وC وغيرها…
2) الثمن لي كيحتاسبوه هو جزء فقط مقابل هاديك تمارة كاملة (لي فيها الحصول على الدم، النقل ديالو، المحافظة عليه فدرجة حرارة معينة، تحديد الفصيلة، والتحاليل لي كيدارو عليه…) بعبارة اخرى غير ثمن التحاليل بوحدهوم يلى درتيهم يجيوك اغلى من ثمن كيس الدم!!..
3) الناس الفقراء لي عندهوم الراميد مكيخلصو والو، ولي عندهوم التغطية الصحية كيعوضو ليهم الثمن ديالو…
4) فاش كتنشر بحال هاد المنشورات راك كتساهم فعزوف الناس على التبرع بالدم وبالتالي نهار يحتاجو شي حد من عائلتك مغاديش تلقاه وخا تكون مستعد تدفع الملايين!!
اما لي قالك نمشي نتبرع فنفس اليوم فهاذا كيظن انه غادي يجرح يدو مثلا ويبقى يعطيه يشرب بالمعلقة!!! حيث معارفش انه عمليه التبرع خاصها وقت وزيد عليه وقت التاهيل وعاد يارب يكون من نفس الفصيلة وقابل للنقل!!! يعني ممكن يجيو العائلة ويتبرعو ولكن دمهم ميكونش صالح لداك المريض!!!..
5) الناس لي كيحتاجو الدم غالبا كتكون الحالة ديالهم حرجة ومستعجلة وبالتالي خاص الدم يكون واجد مسبقا…
6) مركز تحاقن الدم بوجدة من بين أفضل المراكز فالمغرب وكيوفر الدم للجهة الشرقية كاملة..ولذلك خاصنا نشجعوه ونفتاخرو بيه ماشي نطعنو فالناس لي خدامين فيه!….
7)أخيرا مكرهناش يكون الولوج للخدمات الصحية كلها يكون مجاني وسلس وخاصنا نطمحو و ناضلو ونطالبو بيه، ولكن فانتظار نحقو ديكشي خاصنا نتعاملو مع الموجود ونتعايشو مع الواقع وما نبقاوش نمررو المغاطات بدون علم ونقتلو راسنا براسنا!!!.
