مكاينة حتى طريقة باش تهرب من الردار الجديد… وها علاش😱

https://youtu.be/PivhYmrtkBE

بطبيعة الحال كلنا سمعنا أنه مؤخرا يتم تتبيث رادارات جديدة كاتخدم ببرامج جد متطورة فعدد من المدن المغربية و الطرق الوطنية.

هاد الردارات التي أعطت نتائج مبهرة فضبط المخالفات المتعلقة بقانون السير بدقة كبيرة بزاف.

و هنا بالضبط غادي يخرجو عدد من الناس وينشرو مقاطع فيديو على مواقع التواصل الإجتماعي كاتهضر على الطريقة الأنسب أو الحل المثالي السحري كيف ما كايسميوه باش تهرب من هاد الردارات هادي وتقدر ترتاكب المخالفة أُبْلا مايشدك هاد الردار و ماتخلص بالمقابل حتى شي بروصي.

هاد المقاطع تقدر تعرف فيها على مجموعة من الطرق أو الحيل اللي كايعتاقد البعض أنها ناجحة ومضمونة باش مايشدكش الردار وتفادا الغرامات و البروصي ومنها أنك تخبي الترقيم ديال السيارة بالسكوتش أو تزور هاد الأرقام بشي طرق أو تشري واحد السْبْرَايْ تاترشو على الأرقام و بالتالي تايخلي التصويرة غير مقروءة فاش تايضرب فيها الفلاش ديال الردار وكاين اللي مشا بعيد كاع و قال بلي من الأفضل تخلي الطموبيل موسخة و ماتغسلهاش باش البلاكة ديال الطموبيل ماتبقاش تبان…+ وبزااف ديال الطرق..

ولكن واش هاد الحلول بصاح كاتعطي نتيجة وتقدر تخليك تهرب من الردار؟؟؟

الجواب هو “لا” وخا طير وتنزل الردار غايشدك. لأن هاد الردارات كاتخدم ببرامج و تقنيات جد جد متطورة قادمة من الشركة الألمانية فيطرونيك وعندها القدرة أنها تأخذ جميع المعطيات المتعلقة بالسيارة وماشي فقط غير الترقيم ديالها و إنما حتى اللون و النوعية ديالها و أيضا عندها القدرة أنها تكتاشف العلامات المزورة وترسل المخالفة ماشي فقط المتعلقة بالسرعة و إنما حتى المتعلقة بتزوير ترقيم السيارة للشخص اللي رتاكب هاد الفعل المخالف للقانون..

ونزيدك أن هاد الردار كايقدر يديطيكطي حتى الحالة ديالو ف فيديو بالألوان وماشي غير بالكحل و الأبيض..

يعني بلا ماتحاول دير شي حركة حيت راك دايز على المباشر ب 360.

إذن حتى شي حاجة من هاد الطرق مغادي تخليك تفلت من الردار فحالة إيلا ارتكابتي المخالفة حيت هاد الردارات الجداد كايشتغلو بتقنية كاتعتامد على الليزر اللي كايقدر يكونطرولي بزاف ديال الطموبيلات فخطرة وحدة من غير أنه كايقدر يكونطروليو جميع الممرات يعني الطموبيلات اللي غاديين إلى وأيضا الروتور و كايحسب ليك السرعة باش كنتي جاي قبل ماتوصل عندو وحتى فاش كاتجاوزو بعشرات الأمتار ومافيها باس نفكرك أنه يقدر يديطيكطي بزاف ديال المخالفات فطموبيل وحدة بحال مثلا عدم احترام مسافة الأمان .السمطة.الدوبلاج فالخط المتصل ..السرعة وزيد وزيد..

المصدر : صحافة بلادي